Супрацоўнікі Пінскай цэнтральнай раённай бібліятэкі імя Яўгеніі Янішчыц прадставілі бібліятэчную пляцоўку «ЛітПрастора» на літаратурна-музычным фестывалі «Восень у Завоссі», які прайшоў у Баранавіцкім раёне.
Для гасцей фестывалю былі арганізаваны займальныя інтэрактыўныя гульні: беспройгрышная латэрэя «Скарбонка слоў», гульня-віктарына «Пазнай пісьменніка» і «Паэтычная мазаіка».
Увазе наведвальнікаў была прадстаўлена выстава беларускай літаратуры, а таксама тэматычная фотазона, дзе ўсе жадаючыя маглі зрабіць яркія здымкі на памяць.
Бібліятэчная пляцоўка «ЛітПрастора» стала сапраўдным цэнтрам прыцягнення для ўсіх, хто любіць роднае слова, кнігу і беларускую культуру.
