У бібліятэках Пінскага раёна завяршыўся Тыдзень папулярызацыі творчасці вядомай паэткі Беларусі Яўгеніі Янішчыц “Янішчыцкі лістапад” .
Дакрануцца да спадчыны “палескай ластаўкі” прыхільнікі паэзіі змаглі праз правядзенне мноства мерапрыемстваў. У бібліятэках Пінскага раёна прайшлі гадзіны паэзіі, літаратурныя партрэты, літаратурныя вечары, конкурсы чытачоў, агляды творчасці паэтэсы, аформлены кніжныя выставы.
Так, напрыклад, у Пінкавіцкай сельскай бібліятэцы прайшла гадзіна паэзіі «Палесся мілае дзіця». Удзельнікам мерапрыемства бібліятэкар нагадала старонкі жыцця беларускай паэтэсы, пазнаёміла з літаратурнай творчасцю і паэтычнымі зборнікамі знакамітай зямлячкі. На працягу сустрэчы гучалі вершы Яўгеніі Янішчыц. Чытач, Курчаў Дзіма, падзяліўся сваімі ўражаннямі ад наведвання літаратурнага музея паэтэсы ў вёсцы Парэчча. Цікавасць у школьнікаў выклікала і кніжная выстава “Ластаўка палеская”. Шчырая размова пакінула добрыя ўражанні ад сустрэчы з сапраўднай класікай беларускага паэтычнага слова.
“Я дзякую за тое, што было…” – пад такой назвай прайшло выступленне літаратурна-паэтычнай групы ў Лагішынскай ГпБ. Школьнікі Лагішынскай сярэдняй школы з цікавасцю слухалі аповед пра творчы і жыццёвы шлях паэткі, аб каханні да роднага Палесся, да маці, да сына, чыталі яе вершы. У час правядзення мерапрыемства дэманстравалася прэзентацыя “Непрыручаная птушка Палесся”, была аформлена кніжная выстава: “Зорка беларускай паэзіі”.
Ушанаванне памяці знакамітай зямлячкі здзейснілася і на малой радзіме паэткі, у Парэцкай сельскай бібліятэцы. У конкурсе чытачоў пад назвай “Прыедзь у край мой ціхі” прынялі ўдзел вучні Парэцкай базавай школы.
Разнастайныя мерапрыемствы, прысвечаныя творчасці Яўгеніі Янішчыц прайшлі ў Мерчыцкай, Валішчанскай, Жыдчанскай, Малоткавіцкай, Кашавіцкай, Плешчыцкай, Кончыцкай і іншых бібліятэчных установах, але тэматыка і сэнс размоў адзіны – Яўгенія Янішчыц за сваё нядоўгае жыццё пакінула вялікую паэтычную спадчыну для Беларусі і стала адным з сімвалаў Палесся. Постаць Яўгеніі Янішчыц – з шэрагу знакавых асоб Беларусі.
Н.У.Паўлюкавец,
гал.бібліятэкар АБМ
ЦРБ імя Я.Янішчыц